متسلمش دماغك لل AI

اسرع طريقة تخلص بيها المطلوب منك هتؤذيك على المدى البعيد مع وجود ال AI (للمبتدئين او ال juniors خصيصا).

الكلام ده مخصوص للجونيورز وممكن يتطبق في مجالات كتير مش بس صناعة البرمجيات. دلوقتي اكيد بتلاقي ان ٩٠٪ من شغلك ممكن ال AI يخلصهولك من غير ما تبص في المطلوب ولا الحل كمان. من اكبر الاستثمارات اللي ممكن تستثمرها في نفسك في المرحلة دي هي عدم تسليم دماغك لل AI.

لو حابب تكبر في المجال وحابب تبقى عملة نادرة كمان سنة او اتنين، متخليش كل هدفك ازاي اخلص الشغلانه اللي في ايدي باسرع طريقة. لان حقيقي اسرع طريقة في وجود ال AI هتاذيك بشدة على المدى البعيد.

يعني اعمل ايه؟

هطلب منك طلبين مبدئيا:

• عايزك بعد ما تخلص المطلوب منك يبقى عندك العلم والثقة اللي يخلوك تشرح المشكلة وطريقة حلها من الالف للياء مع شرح طرق اخرى لحل نفس المشكلة وازاي فاضلت بينهم.

• عايزك تبذل وقت ومجهود لبناء تصور في مخك لحل المشكلة قبل ما تطلب من ال AI يحلهالك. يعني ايه؟ يعني عايزك تستعمل ال AI في انه يطبق الحل اللي في دماغك مش انه يطلع هو بالحل ويطبقه. طبعا لو عطلت مفيش مانع تستخدمه وترجع للسينيورز اللي حواليك لاستشارتهم في طرق حل ولطلب مراجعة حلك — بس عايزك تبقى حاطط في دماغك ان هدفك تبقى بتستعمل ال AI في انه يطبق اللي في دماغك، مش انه يستبدل دماغك (او انه يستبدلك).